२१ वैशाख : रौतहटको कटहरिया नगरपालिकामा बोक्सीको अन्धविश्वासले निम्त्याएको एक बीभत्स घटना सार्वजनिक भएको छ। कटहरिया नगरपालिका वडा नं. ९, डुमरिया टोलमा बसोबास गर्ने ५५ वर्षीया एकल महिलालाई स्थानीय केही व्यक्तिहरूले घरमै पसेर जघन्य आक्रमण गरेका हुन्। आफ्ना नातेदारको बालक बिरामी हुनुमा ती महिलाको हात रहेको भन्दै उनीहरूले ‘बोक्सी’ को आरोप लगाएर अमानवीय व्यवहार प्रदर्शन गरेका थिए।
पीडितका अनुसार, उनीमाथि कुटपिट मात्र गरिएन, बरु बियरको बोतलमा घोलेको मानव मलमूत्र समेत जबरजस्ती खुवाइयो। घटनाको संवेदनशीलतालाई बुझ्दै इलाका प्रहरी कार्यालय कटहरियाका प्रहरी नायव निरीक्षक मोहन आले मगरको नेतृत्वमा खटिएको टोलीले अचेत अवस्थामा रहेकी ती महिलाको समयमै उद्धार गरेको थियो। उनलाई तत्काल स्थानीय प्राथमिक स्वास्थ्य केन्द्रमा उपचारका लागि लगिएपछि अहिले उनको अवस्था सामान्य रहेको छ।
यस अमानवीय कार्यमा संलग्न रहेको आरोपमा प्रहरीले ३० वर्षीय शंकर माझीलाई नियन्त्रणमा लिएको छ। जिल्ला प्रहरी कार्यालय रौतहटका सूचना अधिकारी प्रहरी नायव उपरीक्षक विष्णु प्रदीप बस्यालले घटनामा संलग्न अन्य व्यक्तिहरूको खोजी भइरहेको र पक्राउ परेका माझीमाथि थप कानुनी अनुसन्धान अघि बढाइएको जानकारी दिएका छन्। नेपालको प्रचलित कानुनले बोक्सीको नाममा गरिने यस्ता कुप्रथा र हिंसालाई गम्भीर अपराध मानेको छ, जसका लागि स्थानीय प्रशासनले दोषीलाई कडा कारबाही गर्ने आश्वासन दिएको छ।
About The Author
